Hövzə Xəbər Agentliyinin verdiyi məlumata görə, həzrət Ayətullah Nuri Həmədani doktor Məsud Pezeşkianla görüşü zamanı onu salamlayaraq hökumətə uğurlar arzulayıb, prezidentin ixlasını və dindarlığını ölkənin icra hakimiyyətində uğurun əsas amillərindən biri kimi qiymətləndirib.
O bildirib: «Hesab edirəm ki, Sizin ixlasınız və dindarlığınız işlərin irəliləməsində və xalqa xidmət göstərilməsində mühüm rol oynaya bilər. Bu xüsusiyyətlər xidmət yolunda olan məsul şəxslər üçün dəyərli sərmayədir.»
Həzrət Ayətullah Nuri Həmədani daha sonra müharibə dövründə ölkənin üzləşdiyi çətin şəraitə toxunaraq bildirib ki, hökumətin həmin dövrdə ən mühüm nailiyyətlərindən biri bazarın uğurlu idarə olunması olub.
O vurğulayıb: Hökumətin mühüm işlərindən biri müharibə dövründə bazarı uğurla idarə etməsi idi. Belə ki, insanlar gündəlik həyatlarında heç bir qıtlıq hiss etmədilər. Dünyanın bir çox ölkəsində belə şəraitdə bazarda ciddi böhranların yarandığını görürük. Lakin ölkəmizdə həyata keçirilən idarəçilik sayəsində bazarda nisbi sabitlik qorundu. Bu isə təqdir və təşəkkürə layiqdir.
Həzrət Ayətullah Nuri Həmədani cəmiyyətdə birliyin qorunmasının vacibliyini vurğulayaraq deyib: Bizim mövqeyimiz sizi və hökuməti dəstəkləməkdir. Hesab edirik ki, cəmiyyətdə birlik qorunmalıdır. İxtilaf yaratmaq inqilabın ziyanınadır. Hamı İnqilabın Ali Məqamlı Rəhbərinin ətrafında birləşməli, onu son qərar sahibi kimi qəbul etməlidir. Məsul şəxslərlə rəhbərlik arasındakı münasibət imamla ardıcılının münasibəti kimi olmalıdır ki, inqilab yolu qüdrətlə davam etsin.
Həzrət Ayətullah Nuri Həmədani regional və beynəlxalq vəziyyətə də toxunaraq hərbi cəbhənin və silahlı qüvvələrin daha da gücləndirilməsinin zəruriliyini vurğulayıb.
O bildirib: Hesab edirik ki, hərbi cəbhə və silahlı qüvvələr daha da gücləndirilməlidir. Bununla yanaşı, diplomatiya sahəsi də dəstəklənməlidir. Danışıqlar meydanında fəaliyyət göstərən şəxslər zəiflədilməməli və təhqir olunmamalıdır. Bununla belə, düşmənin xəbis mahiyyəti və vəfasızlıq tarixçəsi də daim nəzərdə saxlanılmalıdır.
Həzrət Ayətullah Nuri Həmədani çıxışının digər hissəsində milli medianın roluna toxunaraq qeyd edib: Dövlət televiziya və radiosu ölkə naminə görülən işləri xalqa çatdırmalı, ümidsizlik yaradan açıqlamalardan çəkinməlidir. Bu gün cəmiyyət hər zamankından daha çox ümidə və mənəvi ruh yüksəkliyinə ehtiyac duyur. Düzgün informasiya siyasəti ilə xalqın qəlbində ümid gücləndirilməlidir.
O əlavə edib: İnşallah, İnqilabın Ali Məqamlı Rəhbərinin rəhbərliyi, sizin və həmçinin hökumətin səyləri nəticəsində İran daha da ucalacaq. Gözləntimiz budur ki, bütün məsələlərdə rəhbərliyin göstəriş və tövsiyələrinə uyğun hərəkət edilsin. Biz də qeyd etdiyimiz şərtlər çərçivəsində sizi və hökuməti dəstəkləyəcəyik.
Ayətullah Nuri Həmədani ölkənin iqtisadi vəziyyətinə də toxunaraq bildirib: Əgər maliyyə məsələləri və sanksiyaların aradan qaldırılması istiqamətində irəliləyiş əldə olunarsa, hökumətin birinci prioriteti xalqın iqtisadi və məişət problemlərinin həlli olmalıdır ki, cəmiyyət mövcud çətinliklərdən xilas olsun.
Həzrət Ayətullah Nuri Həmədani sonda Qum vilayətinin başçısı mühəndis Bəhnamcoya göstərdiyi xidmətlərə görə təşəkkür edib, əyalətdə həyata keçirilən fəaliyyətləri yüksək qiymətləndirərək onun xalqa xidmət sahəsində gördüyü işləri təqdir edib.
Rəyiniz